القهوة من أكتر المشروبات المحبوبة، واللي معروفة بقدرتها على تحسين التركيز وزيادة مستويات الطاقة.
كتير من الناس بيعتمدوا عليها علشان تفوقهم في أول اليوم، والقهوة بس مش بتأثر على التركيز والنشاط دي ارتبط اسمها بقايمة طويلة من الفوائد الصحية، وده سبب إضافي يخليك تحبها أكتر.
وفي المقال ده هنقولك على عدد من الفوائد المتنوعة للقهوة٬ فكمل قراية!
١- تعزيز مستويات الطاقة:
القهوة بتحتوي على الكافيين اللي هو طبعًا منشط للجهاز العصبي، ومعروف بقدرته على محاربة التعب وزيادة مستويات الطاقة. وفي دراسات أثبتت إن شرب القهوة بيقلل من الإرهاق في وقت التمرين بنسبة ١٢٪ ده غير إنه بيحسن الأداء وبيزود مستوى الطاقة، وبيقلل من الشعور بالتعب.
٢- مرتبطة بانخفاض خطر الإصابة بمرض السكر من النوع الثاني:
أثبتت الدراسات إن تناول القهوة بانتظام مرتبط بانخفاض خطر الإصابة بمرض السكر من النوع التاني على المدى الطويل بنسبة ٦٪
والعلماء بيعتقدوا إن ده بيرجع لقدرة القهوة على الحفاظ على وظايف خلايا بيتا في البنكرياس المسؤولة عن إنتاج الأنسولين لتنظيم مستويات السكر في الدم.
كمان القهوة غنية بمضادات الأكسدة اللي بتأثر على حساسية الأنسولين والالتهابات والتمثيل الغذائي.
٣- بتعزز إدارة الوزن:
وفقًا للأبحاث القهوة ممكن تغير من تخزين الدهون في الجسم وتدعم صحة الأمعاء، ودول حاجات مفيدة لإدارة الوزن، كمان في دراسات أثبتت إن تناول القهوة باستمرار مرتبط بانخفاض دهون الجسم للستات، وكمان إن اللي بيشربوا كوب أو اتنين من القهوة يوميًّا بيكون عندهم نشاط بدني أكتر بنسبة ١٧٪ والنشاط الزيادة طبعًا بيساهم في الحفاظ على الوزن.
٤- بتحارب الاكتئاب:
أثبتت الدراسات إن شرب القهوة مرتبط بخطر الإصابة بالاكتئاب، فكل فنجان قهوة بيستهلكه الشخص يوميًّا بيقلل من تعرضه للاكتئاب بنسبة ٨٪
٥- بتدعم صحة القلب:
القهوة بتفيد صحة القلب، كمان شربها بشكل يومي بيخفض خطر الإصابة بأمراض القلب بنسبة ١٥٪ ومش كده بس دي بتخفض كمان خطر الإصابة بالسكتة الدماغية بنسبة ٢١٪
وعلشان كده المفروض ماتفوتش أبدًّا فنجان القهوة اليومي.
