أثبتت الدراسات والتجارب الحديثة وجود علاقة قوية بين الأكل اللي بناكله وبين صحتنا النفسية، وده لإن العقل أو الدماغ هو جزء من جسم الإنسان، بيتأثر بشكل مباشر بأي مواد غذائية بتدخل للجسم سواء بالسلب أو الإيجاب.
ولو عايزين نتحكم في بعض الانفعالات والمشاعر اللي بنحس بيها زي الحزن، والتوتر، والخوف والاكتئاب فلازم نهتم بالأكل اللي بناكله على مدار اليوم.
مؤخرًا ظهر فرع جديد في علم النفس، والمعروف باسم علم النفس الغذائي، وده بيدل على مدى وأهمية الغذاء لصحتنا النفسية.
وفي أمثلة كتير بتبين ارتباط بعض الأعراض والاضطرابات النفسية بشكل مباشر بأغذية معينة، منها:
١- الخمول وضعف الذاكرة:
نقص مواد غذائية معينة زي الأوميجا ثري وفيتامين بي ١٢، وبي ٦، والأنظمة الغذائية الخالية من الدهون الصحية والكربوهيدرات بتسبب بشكل كبير ضعف وخمول الذاكرة.
٢- اضطراب نقص الانتباه وفرط النشاط:
والاضطراب ده زاد مؤخرًا وانتشر بين الأطفال بسبب بعض السلوكيات الغذائية الخاطئة، زي الإفراط في تناول الأطعمة المليانة سكر صناعي، واللي بيؤدي لزيادة السكر في الدم، وبيعمل على زيادة أعراض نقص الانتباه وفرط النشاط والمعروف بـ ADHD.
٣- الاكتئاب:
نقص عناصر معينة بعينها زي الأوميجا ثري والدهون الصحية بيؤثر بالسلب على المزاج العام، وبتؤدي إلى مشاعر الحزن والاكتئاب، وده لإن نقص المواد دي بشكل مبالغ فيه بيقلل من إفراز هرمون السعادة المسؤول عن تحسين الحالة المزاجية.
وهنذكر هنا بعض الأطعمة اللي هتساعدك على تظبيط مودك، وتحسين حالتك النفسية :
الموز:
من أشهر الفواكه والأغذية اللي بينصح بيها لتحسين المزاج العام، وده لإن الموز بيحتوي على مادة التربتوفان اللي بتساعد الجسم على إفراز هرمون السعادة. وكمان بيحتوي على البوتاسيوم وفيتامين بي٦ اللي بيحسن من عمل وظائف الدماغ.
القهوة :
الكافيين الموجود في القهوة ليه دور كبير جدًّا في المساعدة على التركيز وتنشيط الذاكرة وتحسين المزاج وده بشرط استهلاكها باعتدال وعدم الإفراط في شربها.
الأسماك :
والسبب هو محتواها الغني بالأوميجا ٣، واللي بتعتبر غذاء الدماغ المفضل، وده لإنها بتساعد على تحسين الحالة النفسية للإنسان. وأثبتت التجارب إن الأشخاص اللي بيتناولوا الأسماك لأكثر من مرة في الأسبوع بيتمتعوا بصحة نفسية أفضل من غيرهم.
الشوكولاتة الداكنة:
هي أشهر مضاد للاكتئاب، وده لإنها بتحتوي على مادة التيوبروماين، وهي مادة كيميائية بتساعد الإنسان على الشعور بالفرح والسعادة.
الحبوب الكاملة:
زي الشوفان والقمح لاحتوائها على نسبة ألياف كبيرة بتعمل على توازن معدلات السكر في الدم وتحسين المزاج بشكل عام.
وزي ما في أطعمة وأغذية مهمة بتساعد على تحسين المزاج، في كمان عادات غذائية خاطئة بتسبب الضرر لصحتنا النفسية وهنذكر أهمها هنا:
الأطعمة الغنية بالسكر الأبيض:
السكر الصناعي بيرفع السكر في الدم بشكل كبير وسريع, وكمان بينخفض بسرعة، وده بيؤدي إلى الشعور بالتعب والإرهاق والمزاج السيئ. وعلشان كده المفروض نقلل بشكل كبير من تناول الحلويات ونعتمد أكثر على السكر الموجود في الفواكه.
الدهون الحيوانية المشبعة:
الإفراط في تناول الدهون الحيوانية المشبعة بيؤدي لتراكمها في الدم وصعوبة التخلص منها، وبالتالي الاستمرار في إفراز هرمون الأدرينالين واللي بيسبب الشعور بالقلق والاضطراب والتوتر وتقلب المزاج. والأفضل إننا نعتمد في يومنا على الدهون الصحية زي الموجودة في الأسماك أو المكسرات أو الزيوت الطبيعية زي زيت الزيتون.
المشروبات الكحولية:
من المعروف عن النوع ده من المشروبات إنها بتساهم بشكل كبير في زيادة القلق والتوتر، وده لإنها بتحفز المخ على إطلاق هرمون الأدرينالين المسؤول عن مشاعر الخوف والقلق والتوتر.
