القهوة واحدة من أكتر المشروبات المستهلكة في العالم، كمان تُعتبر تاني أكثر السلع تداولًا بعد البترول! والناس طبعًا ليهم طرق غريبة لشربها، ولاء مش كولد برو ولا لاتيه فرابيه! دي أنواع تانية مش هتتخيلوها ومهما كان أغرب نوع قهوة شربتوه مش هيبقى أغرب من اللي هتقروا عنه في المقال ده!
قهوة كوبي لواك:
قهوة إندونيسية نادرة ومن أغلى القهوات في العالم، وليها طعم وريحة مختلفة ومميزة، وبتتعمل عن طريق حيوان زبّاد النخيل، اللي بيخلوه ياكل حبوب القهوة وبعد ما بيخرجها مع الفضلات بياخدوها وينضفوها ويستخدموها كمشروب! وسعر الكيلو بيوصل لأكتر من ٨٠٠ دولار!
قهوة العاج الأسود:
ودي بقى بيستخدموا فيها الفيل! بعد ما بيأكلوه حبوب القهوة وبيهضمها بينضفوها ويبيعوها، وبيعدي فيها سعر الكيلو الألفين دولار! والناس بتوصف طعمها بإنه أقرب الشوكولاتة والبهارات!
قهوة قرد الريسوس:
القهوة دي منتشرة في الهند، وزي ماهو باين من اسمها! القرد بياكلها بس مابيهضمهاش ده بيتفها! وده اللي بيخلي طعمها مختلف! والكيلو بيعدي فيها الـ ٦٠٠ دولار!
قهوة البيض:
ودي قهوة تقليدية فيتنامية وبتُعرف باسم Cà Phê Trung، بيحطوا البيض مع القهوة مع اللبن المكثف وبيقولوا البيض بيدي القهوة طعم كريمي! وبيعتبروها على إنها أقرب للحلوى.
ودي اخترعوها زمان لما كان اللبن نادر في فيتنام فكانوا بيستخدموا البيض كبديل.
