يعتبر التجميد من أشهر وأسهل طرق حفظ الطعام لفترات طويلة، وهي في الحقيقة طريقة اقتصادية وسهلة، ساعدت البشر في الحفاظ على منتجاتهم الغذائية، خصوصًا مع زيادة الإنتاج والاستهلاك اللي بيشهده العالم بشكل متزايد.

وجميع الهايبر والسوبر ماركت لازم نلاقي فيها قسم كبير خاص بالمجمدات، زي الخضار واللحوم والدواجن والأسماك والمثلجات. حتى محلات البقالة الصغيرة بيكون فيها ثلاجة صغيرة لبعض الأطعمة المجمدة. وده بيدل على مدى أهمية وحجم استهلاك الناس للنوع ده من الأطعمة.

وفي ظل تزايد الاستهلاك، بيشغل بال كتير من الناس سؤال مهم وهو: هل الأكل المجمد مفيد ولا ضار بالصحة؟ هل هي منتجات آمنة ولا خطرة?

في السطور الجاية هنتكلم عن أضرار المأكولات المجمدة وكمان هنتكلم عن أبرز مميزاتها وفوائدها:

– أضرار الأكل المجمد:

١- ارتفاع ضغط الدم:
أغلب المأكولات المجمدة بتحتوي على مواد حافظة, وكمان على كميات كبيرة من الملح، واللي بيؤدي إلى ارتفاع ضغط الدم، وبيتسبب في مشاكل صحية أخرى.

٢- مرض السكر:
في كثير من المنتجات المجمدة بيتم استخدام مادة النشاء، واللي بتتكون أساسًا من البوليمير واللي هو في الأصل عبارة عن جلوكوز، وده نوع من السكر عند استهلاكه بشكل كبير بيؤدي لرفع معدل السكر في الدم، وبالتالي بيزيد من فرص وخطورة الإصابة بالسكري، وممكن يؤدي لزيادة الوزن عند استهلاكه بكميات كبيرة.

الإصابة بالسرطان:
وده واحد من المخاطر المحتملة لاستهلاك المأكولات المجمدة، والسبب في كده إنها بتحتوي على مواد حافظة كثيرة, خاصة اللحوم والدواجن المصنعة زي السوسيس والبرجر والهوت دوج, والأخطر من كده إن في مادة اسمها الأكريلاميد بتتكون أثناء طهي وتسخين المواد المجمدة المصنعة, وهي مادة بتزود من فرص الإصابة بالسرطان.

فقدان بعض العناصر والقيمة الغذائية:
أثناء عملية التجميد، أو التجميد لفترات طويلة جدًّا؛ بيؤدي لتغير وتحلل بعض العناصر الغذائية الموجودة في المأكولات المجمدة, وأكثر المواد اللي بتتأثر بشكل سلبي بالتجميد هي البروتينات والدهون.

– فوائد ومميزات الأكل المجمد:

١- مأكولات آمنة:
وده طبعًا بسبب إن التجميد أو درجات الحرارة المنخفضة (أقل من 18 درجة مئوية) هي درجة بتموت عندها معظم البكتريا الضارة، بشرط تخزينها وتجميدها بشكل صحيح، وكمان فكها وطبخها بطريقة صحيحة.

٢- سهولة تحضير الطعام في أي وقت:
لما تكون عندك مأكولات مجمدة جاهزة على الطبخ في أي وقت, هيسهل عليك كتير وهيوفر لك وقت أكتر, وده لإنك مش هتحتاج كل مرة تعمل فيها أكل إنك تروح للسوبر ماركت علشان تشتري منتجات طازجة.

٣- الأطعمة المجمدة طازجة:
وده لإن أغلب الخضراوات والفواكه المجمدة بيتم جمعها وتخزينها وتجميدها في فترات ذروة نضجها, وللسبب ده بتكون المنتجات دي طازجة وغنية بالقيمة الغذائية على عكس ما بيعتقد كتير من الناس.

٤- توافر المنتجات الموسمية طول العام:
ودي تعتبر ميزة مهمة جدًّا, لإن مابقاش لازم ننتظر موسم فاكهة أو خضار معين علشان نقدر نستمتع بأكلها, بل بالعكس هي أصبحت موجودة ومتوفرة طول السنة. كمان الأماكن والمناطق اللي مش بيتوفر فيها زراعة منتجات معينة, بقت تقدر تستورد الأطعمة المجمدة اللي هي محتاجاها..

٥- تكلفة منخفضة وتقليل الهدر:
تجميد المواد الغذائية بيؤدي لتقليل ثمنها، عندك اللحوم المجمدة مثلًا سعرها أقل من الطازجة اللي بنشتريها من الجزار . كمان التجميد بيساهم  في تقليل هدر الطعام، وده لإن أي طعام فائض ممكن نجمده ونحافظ عليه لوقت استهلاكه مرة تانية بدل ما نرميه.

الاعتدال هو أساس كل شيء، فنقدر نستهلك المأكولات المجمدة بدون إفراط عشان نتجنب مخاطرها المحتملة، بشرط إنها تكون متخزنة في ظروف وأماكن صحية ونظيفة، ونتأكد إنها كانت طازجة وقت تجميدها، كمان نبعد عن اللحوم والدواجن المصنعة والمجمدة بقدر الإمكان.