“5 قواعد يجب عليك اتباعها قبل تناول المانجا” ” شاهد قبل الحذف .. اتيكيت تقطيع وتقشير المانجا” “نصائح للتعامل أثناء أكل المانجا” .. عناوين بنشوفها عن فن التعامل مع فاكهة المانجا وكمية فيديوهات عن طريقة تقطيعها وهلم جرا .. والله كبرتوا الموضوع يا شباب، المانجا فاكهة أبسط من كده، وسواء كانت تيمور أو الفونس أو فص أو سكري أو عويس فكتالوج أكلها معروف عند الشعب المصري والعربي وهو “البانيو” ومش بيقبلوا بأي بديل من قبل حتى اختراع كتاب الاتيكيت أو الكتالوجات المعقدة.
ليه بناكل المانجا في البانيو؟
هنقدملك بعض الأسباب واللي ممكن ماتكونش منطقية بالنسبة لك، ولكن كانت دافع قوي لكتير من الناس اللي سألناها “ليه بتفضلوا أكل المانجا في البانيو”؟
على خطى كبار النجوم
مش في فئة معينة بتحب تقلد نجومهم المفضلين في كل حاجة؟ في مشيتهم ولبسهم وكلامهم؟ خلاص ضيف عندك وطريقة أكلهم كمان… أصل اللي أنت ماتعرفوش إن الفنان الكبير فؤاد المهندس اتعرف عنه إنه مش بيستمتع بأكل المانجا غير في البانيو٬ وكانت من ضمن طقوسه اللي ماقدرش يغيرها، ده غير إنه كان بيحب ياخد دش بعد جريمة أكلها.
والفنان الكبير محمد صبحي كان هو صاحب الفضل في إن الموضوع يبقى عادي بعد ما ظهر في مسلسل يوميات ونيس في مشهد كامل وهو بياكل في البانيو في الخباثة.
محمد صبجي وفؤاد المهندس كانوا كفاية علشان الناس تخرج عن صمتها وتقول ” نعم لأكل المانجا في البانيو”
مساحة آمنة للزروطة
الزروطة مصطلح مصري بيوصف الحالة اللي بيبقى عليها أي شخص بياكل مانجا، ومع إن أكلها في البانيو مش هيمنع الزروطة المتعمدة نظرًا لإنك بتحب تاكل المانجا بإخلاص، ولكن على الأقل هيفضل البانيو بمثابة مساحة آمنة ليك مش هتخرج براها، بدل ما تبقى قاعد مكتف وناقص تاكلها وأنت مربع إيديك وأنت قاعد في أي مكان تاني.
دافع لكسر القواعد
من خلال سؤالنا لبعض الناس اكتشفنا دافع نفسي خفي وهو الرغبة أحيانًا في تكسير أي قواعد أو أي شيء ممكن يقيد الشخص ويقع تحت عنوان “الاتيكيت”، واللي في الغالب عقد بعض الناس وماخلاهاش تستمتع بأنواع من الأكل لها طريقة معينة، زي الملوخية مثلًا طول عمرها بتتاكل بودن القطة ليه فصلتوهم عن بعض وخليتوا كل حاجة تتاكل لوحدها؟ فين روح المغامرة والمتعة ؟.
وفي الغالب الفئة دي بتتعمد تجيب فيديوهات اتيكيت أكل المانجا وتقعد تتفرج عليها وهي بتعمل عكسها تمامًا، وبعد الفرجة ببيحصل عندها نوع من إشباع الذات ولذة في الانتصار.
لها زي رسمي
شوفت قبل كده أي أكلة لها زي رسمي؟ المانجا في البانيو ليها زي رسمي معين أو زي ما بيتقال “دريس كود” معروف إنها بتتاكل بالـ”فانلة” والشورت ومعاك طبق زي طبق الغسيل تملاه مانجا كإنك نازل تعوم بالظبط، والزي ده متعارف عليه برضه وممكن تطبقه مع أكل البطيخ.
في أكلات حلاوتها ومتعتها مش بس في طعمها ولكن في طقوسها وكل فئة وبلد وثقافة ليها طقوسها وطريقتها في كل أكلة، ومش لازم كل واحد يمشي بكتالوج في إيده على قد ما مهم ياكل وهو مبسوط، وزي ما قال الكاتب إيهاب فاروق أحمد، في كتاب عجائب البلاد حول العالم “فالمعروف أن فن الاتيكيت قد ظبط كل شيء، لكنه لم يفلح حتى الأن في ظبط زروطة آكلي المانجو.. خصوصًا التيمور منها والفونس”
