جسم الإنسان بيحتاج لكمية معينة من البروتين علشان تغطي احتياجات جسمه اليومية، وده اللي الناس بتلجأ لأكله بأشكال مختلفة سواء زي البروتين الباودر، أو البروتين بار أو حتى اللحوم والبقول.. إلخ.
بس لو حد بينسى أي وجبة من الوجبات، أو حتى السناك بين الوجبات، أو لو عامل دايت وبيكون نفسه في حاجة حلوة بس ماتضرش بالدايت فهنا بيلجأوا لاستخدام البروتين بار.
إيه هو البروتين بار؟
البروتين بار هو بار بيشبه الشوكولاتة من برا لكن قيمته الغذائية بتكون مختلفة، لإنه بيحتوي على كميات كبيرة من البروتين، وكمان ألياف وكربوهيدرات مفيدة وبعض الإضافات التانية زي المكسرات والفاكهة المجففة زي التمر أو الفراولة.
فوايد البروتين بار كتيرة زي:
- زيادة الكتلة العضلية.
- التقليل من الآلام العضلية بعد الرياضة؛ لإن بعد التمرينات المفروض تاكل نسبة بروتين عالية سواء عاوز تخس أو تبني عضلات، وده بيساعد على الاستشفاء العضلي.
- تحسين الأداء الرياضي ومد الجسم بالطاقة.
- الشعور بالشبع.
إمتى أحسن وقت تاكل فيه البروتين بار؟
أفضل وقت تاكل فيه البروتين بار علشان جسمك يستفاد هو بعد التمرين أو بين الوجبات.
ودلوقتي هنقولكم إيه أحسن بارات بروتين ممكن تاكلوها وماتبقاش مضرة للدايت:
١- Secrets من Organic Nation:
الميزة في بروتين بار أورجانيك نيشن إن مافيهوش منتجات حيوانية؛ فسواء كنت نباتي أو صايم المنتج هيكون مناسب ليك!
البار وزنه ٦٥ جرام، فيه ٢٠ جرام بروتين، وبيتكون من: بروتين أرز، وزبدة لوز، وكاجو، وبندق، وبذور قرع، وحبوب سمسم، وبذور بذر الكتان، وكاكاو، وملح.
وفيه منه نكهات كتيرة زي: فطيرة التفاح، شوكولاتة دارك، تشيز كيك بلوبيري، مابل دوناتس، بانوفي باي، وفانيلا بيرث داي كيك، وموكا.
٢- TVN:
وزنه ٧٠ جرام، وفيه ٣٢ جرام بروتين، و١٧١ سعر حراري، و٣ جرام دهون، و٤ جرام كاربوهيدرات، وكمان موجود بأطعم كتيرة زي الكوكيز آيسكريم، والكوكيز والشوكولاتة، والنعناع والشوكولاتة والتشيز كيك فراولة، واللوتس، وكوكيز بالفراولة، بلوبيري مافينز، وأطعم تانية كتير.
٣- أبو عوف:
أبو عوف بروتين بار ميزته إنه خالي من الجلوتين، وزنه ٧٠ جرام وفيه ٢٢ جرام بروتين، و٢٥٨ سعر حراري، و٨ جرام سكر، ومتوفر بأطعم كتير ممكن ماتلاقيهاش في أي بروتين بار تاني زي: بالتوت وجوز الهند، بالكرانبيري وجوزالهند، بالشوكولاتة والقهوة، بالكراميل والمكسرات، بلاك فوريست وفاكهة مجففة، وموز بالكاجو، وبراونيز، ولوز، وبسكويت بالكراميل، وبندق.
٤- ZERO:
زيرو بروتين بار وزنه ٧٠ جرام، وميزته إنه خالي من السكر ومُحلى بستيفيا، كمان فيه ٣٠ جرام بروتين، و٤ جرام كاربوهيدرات، و٣ جرام دهون، و١٦٣ سعر حراري.
وفيه أطعم مختلفة كتير زي: الفراولة، الكراميل، البراونيز، بسكويت فانيليا، القهوة، التمر، زبدة الفول السوداني، دبل شوكليت كوكيز.. وغيرها كتير.
٥- إمتنان:
بروتين بار امتنان وزنه ٧٠ جرام، خالي من السكر ومخفض الدهون، وكل بار بيحتوي علي ٢٠ جرام بروتين، وفيه منه أكتر من نكهة زي بجوز الهند، والكاكاو، والقرفة، والفول السوداني.
في أنواع تانية كتير من البروتين بار زي هايب، وبيست، كل الاختلاف بيكون في نسبة البروتين والكارب والدهون وطبعًا وجود سكر، ماتنسوش تشاركونا بأفضل بروتين بار بالنسبالكم على همم.
