الشوكولاتة بجميع أشكالها هي من أكتر الحلويات المفضلة للناس حول العالم، وفي ناس بتستهلكها بشكل يومي، لكن الشوكولاتة بتاعة النهارده مختلفة جدًّا عن الشوكولاتة زمان لما وصلت لأوروبا لأول مرة من أمريكا الجنوبية في حوالي القرن السادس عشر.
بالنسبة لشعب الأزتك؛ كانوا بيستهلكوا مشروب الكاكاو بكمية كبيرة، وكان ليه أهمية ثقافية ووطنية كبيرة، وكانوا كمان بيبصوا له على إنه دواء بيعالج أمراض كتير جدًّا منها الحمى والإسهال والذبحة الصدرية وتسوس الأسنان.
ويبدو إن الموضوع ده بسبب فوايده الكتيرة زي التركيز العالي للبوليفينول الموجود في الكاكاو الطبيعي، وهو عبارة عن مركبات مضادة للأكسدة بتبقى موجودة في الفاكهة والخضروات واللي بتحمي الجسم من الجذور الحرة، اللي مرتبطة بأمراض كتيرة.
زمان:
أول حد بدأ نشر الكاكاو في أوروبا هو “هرنان كورتيس”، الفاتح الإسباني، وهو كان جندي ومستكشف، سنة ١٥١٨ وصل كورتيس ورجالته لمكان جديد وهو المكسيك دلوقتي، وراحوا عاصمة الأزتك “تينوختيتلان”، وخلال فترة وجودهم في المكسيك شربوا مشروب اسمه “شيكولاتل”، والمشروب ده كان حبوب الكاكاو المحمصة المطحونة واللي اتغلت مع بهارات تانية وفلفل حار في مياه. الأسبان لقوا المشروب مر جدًّا ومش حلو، لكن لما كورتيس شاف ملك الأزتيك بيشربه حوالي ٥٠ مرة في اليوم اهتم بإنه ياخده معاه إسبانيا، وقتها تم طحن حبوب الكاكاو اتخلطت بالسكر والعسل وبقت مشروب شائع بين النخبة.
وفي القرن التاسع عشر “جوزيف فراي” وأولاده عملوا أول قطعة شوكولاتة.
“هرنان كورتيس”
من مجرد حبوب إلى ألواح الشوكولاتة:
حبوب الكاكاو في شكلها الطبيعي بتحتوي على كمية كبيرة من مضادات الأكسدة، وعملية تحويلها للشوكولاتة بيقلل المواد دي بنسبة كبيرة.
وأظهرت الأبحاث إن مسحوق الكاكاو الطبيعي بيحتوي على ١٠ أضعاف مضادات الأكسدة اللي موجودة في الشوكولاتة العادية.
الشوكولاتة الداكنة طبعًا بتحتوي على أعلى نسبة من مضادات الأكسدة مقارنة بالشوكولاتة بالحليب.
الفوائد الصحية:
الأبحاث لقت إن الشوكولاتة الداكنة ومنتجات الكاكاو تحتوي على ٢٠٠ مجم على الأقل من فلافانول الكاكاو اللي بيحسن من مرونة الأوعية الدموية واللي بيساعد على تدفق الدم، واستهلاك فلافانول الكاكاو بانتظام بيساعد الجسم على تنظيم ضغط الدم وتدفق الدم للأعضاء وللدماغ وده بيحسن الأداء المعرفي.
كمان بيساعد على تعافي العضلات بعد التمرينات الشاقة، وده بفضل المواد المضادة للأكسدة ومضادات الالتهابات.
بس أهم حاجة وأنت بتختار نوع شوكولاتة أو كاكاو حاول تختار نوع داكن أو مسحوق طبيعي علشان تضمن إنك تحصل على كل الفوائد الصحية دي.
