التدوير على أفضل زيت ممكن تستخدمه في الطبخ موضوع مش سهل زي ما أنت متخيل! لإن الخيارات كتيرة جدًّا!
بالرغم من انتشار زيت الزيتون في كل مكان؛ إلا إن في أنواع كتير من زيوت الطبخ المختلفة الغنية بالمغذيات، وتستحق مكان في مطبخك.
معظم زيوت الطبخ لها صفات غذائية متشابهة لحد كبير زي السعرات الحرارية ومحتوى الدهون الكلي، إلا إنها بتختلف اختلاف كبير من حيث النكهة، والرائحة، وطريقة الطبخ. علشان كده أفضل زيت طبخ صحي بيعتمد على الوصفة اللي بتحاول تحضرها. سواء كنت بتخبز أو بتقلي. في زيت بيناسب اللي تحتاجه بالضبط. تابع معانا علشان تعرف إيه هي أنواع الزيوت الصحية.
زيت الكانولا:
بيستخرج الزيت من بذور الكانولا، وهي بذور اللفت، ويعتبر من الزيوت الصحية لإن فيه أحماض أوميغا 3 المفيدة لصحة القلب والأوعية الدموية. ويعتبر خالي من الدهون، وبيحتوي على 7% بس من الدهون المشبعة.
كمان مناسب لأي نوع من أنواع الطبخ تقريبًا، ومثالي لتتبيل السلطة والمخبوزات والمقالي.
زيت الأفوكادو:
هو زيت غني بالدهون الأحادية غير المشبعة، وله نكهة تشبه الأفوكادو، وبيحتوي على أعلى مستويات من الدهون غير المشبعة مقارنةً بباقي زيوت الطبخ التانية، وبيجي في المرتبة التانية بعد زيت الزيتون. وبيحتوي زيت الأفوكادو على نسبة قليلة من الدهون غير المشبعة.
ليه زيت الأفوكادو خيار ممتاز للطبخ؟
لإنه بيتحمل درجات الحرارة العالية، وده بيخليه مناسب للقلي أو الشوي أو التحميص.
زيت جوز الهند:
بيستخدم غالبًا كبديل للزبدة، وينصح بالاعتدال في استخدامه لإنه بيحتوي على كمية كبيرة من الدهون المشبعة على عكس باقية الزيوت النباتية التانية.
زيت الزيتون:
يعتبر زيت الزيتون من أشهر زيوت الطبخ، وله أنواع كتير منها:
١- زيت الزيتون بكر ممتاز Extra virgin oil:
وهو من أجود وأغلى أنواع زيت الزيتون، وبيتعمل من أول عصره، ونسبة الحموضة فيه قليلة، وكل ما قلت نسبة الحموضة زادت جودة الزيت، غير إنه بيحتوي على عناصر غذائية وأحماض دهنية أساسية وطعمه ممتاز؛ ولكن ماينصحش باستخدامه في درجات الحرارة العالية.
٢- زيت الزيتون البكر Virgin oil:
بيختلف عن النوع اللي قبله بإنه أكتر حموضة، وده بيخليه أقل جودة، و بيأثر على طعمه وريحته وفوائده الصحية، وبيكون أقل سعر.
٣- زيت الزيتون العادي أو المكرر:
بيجي النوع ده في المرتبة الثالثة من حيث الجودة ونسبة الحموضة، و يعتبر الأقل سعرًا.
وبيتم تصنيعه من تكرير الزيتون، وتعريضه للحرارة وهو بيعتبر خيار جيد للطبخ، لإنه بيتحمل درجات الحرارة العالية.
زيت فول الصويا:
بيستخرج الزيت من فول الصويا، وبيحتوي على مضادات أكسدة طبيعية بتفضل في الزيت بعد استخراجه، وبيتميز زيت فول الصويا بأحماض أوميغا 3، والدهون غير المشبعة المفيدة لجسم الإنسان.
زيت اللوز:
بيحتوي زيت اللوز على نسبة عالية من الدهون الأحادية غير المشبعة، وده بيخليه خيار مناسب لمرضى الكوليسترول، وممكن استخدامه للطبخ على حرارة عالية، بتوصل لـ 495 درجة مئوية.
زيت الجوز:
بيحتوي زيت الجوز على نسبة عالية من الدهون الأحادية غير المشبعة وأحماض أوميغا 3، و ينصح باستخدامه لمرضى القلب والسكر، وبيتميز بارتفاع درجة احتراقه، وبيستخدم للطبخ على درجات حرارة مرتفعة.
