إمتى يشرب طفلك الماء؟ إمتى تبدأي إنك تدي الطفل الرضيع أكل؟ كم عدد رضعات الطفل في الشهر الأول؟ وإيه هي أفضل وجبات الأطفال حديثي الولادة؟ وأسئلة كثيرة عن تغذية المولود في الشهر الأول بتحتار فيها الستات حديثة الأمومة!
تعتبر متطلبات الأمومة من الحاجات الصعبة على الأم خاصة إذا كانت بتمر بيها للمرة الأولى، لإنها ماتعرفش من أي مكان تبدأ مع رضيعها، وإزاي تتعامل معاه وإزاي تقدر تهديه لما يعيط وإيه هي الأطعمة والمشروبات المناسبة للطفل من الولادة ومع تطور مراحل نموه. أحيانًا ممكن تتلقى الأم النصائح أو المعلومات من المقربات اللي مروا بالتجربة نفسها قبل كده، ولكن هنختصر عليكي الموضوع ونقدم لك جدول تغذية الطفل الرضيع من الشهر الأول، من لحظة الولادة، علشان يحصل على كل اللي يلزمه من فيتامينات ومعادن من خلال عدد الرضعات الصحيحة والتغذية السليمة.
تغذية الأطفال الرضع في الشهر الأول:
من الصعب تقديم أي من الأكلات للأطفال، وبيتم الاعتماد بس على الرضاعة الطبيعية أو الصناعية، ومن المهم الحرص على إن الطفل يتعرض لأشعة الشمس علشان فيتامين د، وتقديم جرعات صغيرة من الفيتامينات والمعادن اللي بيوصفها الدكتور.
وبيحتاج الطفل في شهره الأول لحوالي 8 رضعات طبيعية خلال اليوم، يعني الرضاعة كل ساعتين لـ 3 ساعات تقريبًا، وفي حالة الرضاعة الصناعية فالطفل الرضيع بيحتاج حوالي 6 رضعات خلال اليوم يعني كل 4 ساعات تقريبًا.
إمتى بيتم إدخال الأكل للطفل؟
بعض الأمهات بتسأل: إمتى أبدأ أأكل طفلي؟
بتوصي منظمة الصحة العالمية بضرورة الالتزام بالرضاعة قبل ما يتم 6 أشهر، لإن تقديم الأكل له قبل كده بيشكل خطر عليه وعلى جهازه الهضمي، لإن جهازه الهضمي بيستمر بالتكوين خلال الستة شهور الأولى من عمره، وماتقدرش معدته الصغيرة على هضم الأكل قبل الفترة دي.
تقدري تبدأي في تدخيل الأكلات الصلبة مع مراعاة الأساسيات من ناحية:
- القوام المناسب لكل مرحلة عمرية.
- تقديم كل نوع لمدة أسبوع قبل البدء في نوع جديد، للتأكد من عدم وجود حساسية.
- تقديم الأكلات المناسبة لكل مرحلة عمرية.
ودي قائمة أكلات بيحبها أغلب الأطفال الرضع:
١- التفاح:
تقدري تبدأي تقديمه في المرحلة العمرية من ستة لتسعة شهور.
التفاح هو الفاكهة الأكثر تفضيلًا عند الأطفال، وبيحتوي التفاح على الألياف اللي بتساعد على تحسين حركة الأمعاء عند الأطفال الرضع، وبيحتوي على فيتامينات “أ” و”هـ” والحديد والمغنيسيوم والسيلينيوم.
٢- الموز:
تقدري تبدأي تدخلي الموز في سن ستة شهور، علشان الموز غني بالبوتاسيوم اللي بيساعد على توازن الماء في الجسم، وبيساعد على تحسين أداء العضلات وضبط ضربات القلب، وبيقي من حصوات الكلى وهشاشة العظام في المستقبل، كمان الموز غني بالألياف اللي بتحسن أداء الجهاز الهضمي، والكربوهيدرات اللي بتدي طفلك الطاقة.
٣- الأفوكادو:
من أفضل الأكلات اللي ممكن تقديمها لطفلك بداية من عمر أربعة شهور، لإنه غني بالدهون الأحادية غير المشبعة، اللي بتساعد على تطور الدماغ، وبتدي طفلك الطاقة اللي بيحتاجها، ده غير إنه غني بالألياف اللي بتساعد في عملية الهضم.
٤- الكمثرى:
فاكهة ذات طعم مميز بيحبها أغلب الأطفال الرضع، ممكن تقديمها في المرحلة العمرية ما بين ستة لثمانية شهور، فهي غنية بالألياف وفيتامين “ج” ومضادات الأكسدة والنحاس، وده بيدعم الجهاز المناعي لطفلك، ويحمي خلايا جسمه من التلف، الكمثرى من الفواكه اللطيفة على الجهاز الهضمي الحساس لطفلك، وينصح بها الدكاترة لمقاومة الإمساك، ده غير إنك مابتحتاجيش إنك تطبخي الكمثرى الناضجة، فهي لينة وتقدري تهرسيها باستخدام الشوكة.
٥- الجزر:
غني بمادة البيتا كاروتين اللي بتساعد على النمو الصحي للبشرة والنظر والجهاز المناعي لطفلك، وكمان غني بفيتامينات “ب8″ و”ج” والكالسيوم والبوتاسيوم وحمض الفوليك والحديد والمنجنيز، وللأطفال الرضع قبل مرحلة المضغ، اسلقي الجزر أو اطبخيه على البخار واهرسيه، لغاية ما يوصل للقوام المناسب لعمر طفلك، ولو كان طفلك بدأ المضغ، قدمي له شرائح الجزر الرقيقة.
ملحوظة مهمة: لازم تقشري الجزر، إن معدة الأطفال الرضع غير قادرة على هضم القشرة.
