الطبخ فن، زيه زي الرسم والمزيكا، جزء منه بيعتمد على إبداع الفنان، والجزء الثاني ليه علاقة بالمهارة والاحتراف والتدريب على أساسيات فن الطبخ.
ومؤخرًا زاد اهتمام الناس بفن الطبخ، وبقى في تنوع واضح وملحوظ في أصناف الأكل، وزاد معاه اهتمام الناس بتعلم الطبخ، فهنلاقي قنوات فضائية كتيرة متخصصة بس في تعليم فن الطبخ، وجميع القنوات التانية غير المتخصصة هنلاقي من ضمن برامجها برنامج واحد على الأقل خاص بالطبخ، ده غير الصفحات والجروبات المنتشرة على السوشيال ميديا بشكل ملحوظ واللي كل هدفها هو تعليم فن الطبخ.
وبقى الطبخ فن ممكن تتعلمه بسهولة، لو اتدربت على بعض الأساسيات، اللي أي طباخ لازم يكون عارفها وملم بيها، وهنا في المقال ده هنوضحلك أهم الأساسيات اللي محتاجها عشان تبدأ تطبخ.
- أولًا:
لازم تكون ملم بكل قواعد السلامة والأمان وبتعرف تتعامل مع الأفران والبوتجازات سواء الكهربائية منها أو اللي بتشتغل بالغاز، وكمان لازم تكون بتعرف تتعامل مع الأدوات الحادة زي السكاكين أو أي أدوات خطيرة علشان تحمي نفسك من أي أذى أو خطر. - ثانيًا:
نظافة المكان بمعنى إن لازم يكون المكان اللي هتطبخ فيه والأدوات اللي هتستخدمها نظيفة ومعقمة، ولازم تبعد عن أي أدوات وأواني ملوثة عشان تبعد عن خطر الإصابة بأي عدوى أو مرض. كمان لازم تكون حريص على غسل ونضافة المكونات المحتاجة للغسيل زي الخضروات والفواكه، والدواجن واللحوم.
- ثالثًا:
مهم جدًّا قبل ما تبتدي في أي طبخة؛ إن يكون عندك الوصفة والمكونات وطريقة الطهي بدقة كاملة، ويفضل إنك كمبتدء يكون عندك كتاب خاص بوصفات الطهي. - رابعًا:
لازم تتعلم وتتعرف على طرق معالجة وطهي الطعام المختلفة، واللي من أشهرها: السلق والشوي والتحمير والخبز والقلي. - خامسًا:
اختيار مكونات الطبخة أو الوصفة بعناية جيدة زي الخضروات مثلًا لازم تكون خضرا وفريش وكذلك الفاكهة، اللحوم والدواجن والأسماك يكون لونها فاتح وطبيعي وريحتها طبيعية وتكون ماسكة نفسها ومش مهرية. - سادسًا:
لازم تعرف أنواع اللحوم، وإن كل قطعة من الذبيحة ليها طريقة طهي وتسوية مختلفة، فطريقة طهي الريش مثلًا بتختلف عن طريقة طهي لحمة الراس أو لحمة الفخذ، في قطع مخصصة للشوي وفي قطع مخصصة أو بتكون أحسن في السلق أو الطبخ التقليدي المعتاد وهكذا. - سابعًا:
لازم تعرف إزاي تتعامل مع التوابل ومنكهات الأكل؛ فمش كل التوابل والبهارات طعمها بيليق على أي أكل، مثال على كده: الكاري والكركم مش هيليقوا أبدًا ولا طعمهم هيكون حلو مع الكبدة الإسكندراني، لكن هيضيفوا طعم قوي ومحبب في الأكلات الهندية مثلًا أو الأطباق الخليجية.
كمان لازم تعرف إن الأكل مش بيكون حلو بكتر التوابل؛ بل بيكون بالتنفيذ الجيد واتباع الطريقة والمقادير بدقة جيدة. يعني نقدر نعتبر أن التوابل سلاح ذو حدين؛ ممكن تعزز من طعم الطبق وممكن تبوظه. - ثامنًا:
التعامل مع المواد الدهنية زي السمنة والزبدة والزيوت باختلاف أنواعها؛ فمش أي طبخة ممكن نضيفلها أي حاجة من دول، عندك مثلا المخبوزات، في أنواع بتحتاج سمنة بس وهتفشل لو استبدلت السمنة بالزبدة والعكس. لازم تعرف كمان إن في زيوت خاصة بالقلي وزيوت خاصة بالطبخ، وده لإن كل زيت ليه درجة حرارة معينة لو تخطاها بيتحرق. يعني مثلا ما ينفعش نقلي أبدًا بزيت الزيتون، لكن ممكن نستعمله في السلطات أو تشويح الخضار على نار خفيفة. - تاسعًا:
لو عندك ضيوف ابعد تمامًا عن أنك تجرب وصفة جديدة؛ وحاول تقدم حاجة سهلة تكون بتعرف تطبخها بشكل جيد.
وأخيرًا الطبخ قد يبدو أحيانًا إنه حاجة صعبة ومتعبة، ولكن في الحقيقة هو سهل جدًّا وممتع خصوصًا مع التدريب المستمر، ومع الوقت والتجريب هتلاقي نفسك قادر على تقديم أطباق لذيذة ومميزة.
