بوبا ولا بابل؟ كل مرة أقول اشرب فيها بوبا الاقي صديقة -من محبي الأكل الآسيوي ومتابعة أولى لأي تريند كوري أو آسيوي في العموم- تقولي أن اسمه بابل مش بوبا!
فقررت بدوري، أني ادور عنه واجربه بنفسي عشان اعرف إيه هو الشاي اللي اتشهر وبقى فيه مطاعم وأماكن كتيرة أوي بتقدمه بشكل دوري، وكمان لقيت إن ساعات فيه انواع منه مش موجودة بسبب الاقبال الشديد عليه من الجمهور والناس.
وعليه، قررت انقلكم رحلة بحثي وتجربتي دي هنا على همم، عشان لو حابين تجربوا البوبا – أو على رأي سلمى صديقتي “أسمه بابل يا امنية مش بوباااا!”.
ايه هو البوبا وشاي البوبا؟
شاي البوبا هو مشروب تايواني من قارة آسيا، انتشر في تايوان في الثمانينات، وبعدها المهاجرين التايوانيين لأمريكا عرفوا الناس بيه، وبقى منتشر في أمريكا ووصل بعدها للدول العربية ومصر من حوالي ٣ – ٤ سنين.
حبوب البوبا هي في الأصل عبارة عن حبيبات مدورة صغيرة – بعض الناس بيطلقوا عليها اسم التابيوكا أو البابل – مصنوعة من نشا نبات اسمه الكاسافا، وهو نبات شبيه نوعا ما من البطاطا الحلوة والبطاطس بتاعتنا. وعليه، هو خالي من الجلوتين، فمنقلقش خالص من جزئية انه ممكن يتعب معدتنا.
الشاي دة مكون من حبوب البوبا، ولبن (حيواني أو نباتي)، ثلج، صوص انت بتحبه، وممكن كمان تضيف عليه قهوة أو شاي أو أي إضافات أخرى.
بتتعمل ازاي حبيبات البوبا؟
على الرغم من أنها تبدو للبعض إنه صعبة، فهي عكس دة تماما.
- هنجيب مياه مغلية، نحط عليها نشا (ومش لازم نشا الكاسافا).
- هنعجنها لحد ما يظهر معانا قوام العجين.
- هنضيف كراميل أو فانيليا أو شراب السكر البني للعجين عشان يكون للحبوب طعم مميز.
- هنعجن ونخلط تاني العجين كويس أوي.
- هنشكل العجينة على هيئة اسطوانة طويلة ورفيعة جدا، وبعدين نقطعها لقطع صغيرة أقرب للكرات المدورة.
- هنحطها في ماء مغلي لمدة نصف ساعة.
وبكدة هتكون البوبا جاهزة عندنا!
في حال أنكوا -وبإحتمالية كبيرة مش هتعملوا كل دة- فتعالوا نقولوكوا منين تجربوا شاي البوبا، هنا في القاهرة وكمان في الساحل!
PÀO باو
سواء انتوا في التجمع، أكتوبر، الساحل، باو معاكوا في كل مكان. من مميزات باو أن عنده نكهات وإضافات كتيرة أوي هتعجبكوا لشاي البوبا. فمثلا هو مميز بشاي البوبا بالقهوة والكريم بروليه وكمان عنده شاي بوبا بالفواكه زي الباشن فروت.
الفروع:
- التجمع: The Drive by Waterway
- الشيخ زايد: Twelve by The Platform
- الساحل الشمالي: Telal & Northed
يولي Yolé
بوبا بالزبادي والفواكه؟ ليه لأ. ف عند يولى هتلاقوا كل الإختيارات الصحية الخالية من السكر وال 100 % نباتية ولذيذة كمان واللبن اللي بيستخدموه جاي لينا مخصوص من أسبانيا.
يولى هي علامة تجارية من سنغافورة وموجودة في بلدان كتيرة زي تايوان وأسبانيا وأمريكا وانجلترا ودلوقتي هي في مصر.
الفروع:
- التجمع الخامس: The Drive by Waterway
أرابيكا Arabica
“عايزينه عادي ولا مع بوبا؟” دة مبدأ بيعتمد عليه ارابيكا في تقديم المشروبات الخاصة به. فنفس المشروب ممكن تطلبوه زي ما هو وممكن تختاروا اضافة حبيبات البوبا عليه.
وده بيدي تنوع كبير لمختلف الأذواق وعشان تجربوا أنواع جديدة من شاي البوبا أنتوا مجربتوهاش قبل كدا زي الموكا فرابيه بالبوبا و زي سموزي المانجة بالبوبا.
كمان ارابيكا عنده آيس كريم بالبوبا المتوفر بثلاث نكهات متنوعة لو حابين تجربوا آيس كريم مختلف الصيف دة.
الفروع:
- الساحل الشمالي
- التجمع الخامس
- مصر الجديدة
زينزو Zenzoo: من برشلونة للشيخ زايد
من برشلونة ومدريد، مرورا بـ عمان وسانتا كروز لحد الشيخ زايد، وصل لينا “زينزو Zenzoo”.
من الأماكن اللي هتجربوا وتدوقوا منها ثقافات بلاد كتيرة ومتعددة في طريقة تناولهم لشاي البوبا.
فهتلاقوا ببساطة عندهم خيارات متعددة زي شاي البوبا بالأوريو و شاي البوبا بالفراولة أو لو بتحبوا الشوكولاتة، فهتلاقوا شاي بوبا بالموكا والشوكولاتة.
الفروع:
- الشيخ زايد: Walk of Cairo
TAIYAKI تاياكي
اشتهر تاياكي بالأيس كريم الملون اللي في أحيان كتيرة لونه أسود والملفوف بطبقة مقرمشة على هيئة سمكة صغيرة. ولكن ابداعات تاياكي موقفتش لحد هنا، ابتكر وجاب لنا وصفات متعددة من المطبخ الأسيوي واللي منها بالتأكيد شاي البوبا.
هتلاقوا هناك أنواع مختلفة من شاي البوبا الخفيفة والمنعشة في الصيف.
الفروع:
- الساحل الشمالي: مراسي
- التجمع الخامس: The Spot Mall- CFC – Open Air Mall
- مدينة نصر: City Hub
- أكتوبر: Mall of Arabia – FYVES
- الزمالك: ممشى أهل مصر
Moishi مويشي
شاي البوبا هو واحد من الأكثر مبيعا في قائمة مطعم مويشي، فهو مميز بنكهات واضافات بتعجب كل الأذواق. ولأنه برده مكان بيقدم بجانب شاي البوبا قائمة بمأكولات آسيوية متنوعة فأكيد ممكن تتجمعوا مع اصحابكم فيه، خصوصا أن له فروع كتيرة أوي في أنحاء القاهرة.
الفروع:
- التجمع: CFC – Arabella Plaza
- مصر الجديدة: City Center Almaza
- المعادي: The Field Maadi
- أكتوبر: Mall of Egypt -Arkan Plaza
- مدينة نصر: City Stars Mall
MŌMOCHI موموتشي
وافل وعليه آيس كريم بحبيبات البوبا؟ إزاي وفين؟. ده من الإختراعات اللي قدمتهالنا موموتشي في رأس السنة ولسة مكملة معاهم في قائمة الطعام الخاصة بيهم. هم مش بس بيقدموا شاي بوبا بنكهات أكتر من رائعة! لكن هم برضه عملوا إفتكاسات جديدة للبوبا ذات نفسها زي إختراع الوافل بالبوبا وآيس كريم البوبا وغيره كتير.
الفروع:
أكتوبر: Mall of Arabia
التجمع: Point 90 Mall – Flamingo Hypermarket – The Yard
