في كثير من الأوقات قعدة شط البحر بتكون محتاجة شوية راحة واسترخاء، خصوصاً بعد ٣ ساعات عوم ولعب في المياه. فبنكون عايزين نتبسط بالشمس وناخد التان المطلوب “الدليل الوحيد على أننا كنا في أجازة الصيف” وبعدها ناكل حاجة خفيفة.
وهنا بقى، بيجي دور الحاجة الخفيفة، في مسمى البعض مننا، الحاجة الخفيفة دي بتختلف، ممكن ناس تشوفها ساندوتش بطاطس محمرة بالكاتشب والمايونيز، وممكن ناس تانية تتفق أن طبق فاكهة مليان بطيخ ومانجو وعنب هو الأمثل خصوصاً لو مثلج وساقع وفريش. فيه ناس تانية بقى شايفين أن المكسرات زي اللب والكاجو والسوداني المقشر هو أهم سناك على البحر خصوصاً مع الدردشات والحكايات اللي مش بنفتكرها غير واحنا رايقين وقاعدين قدام البحر وقت الغروب…
علشان كدة في مقالنا النهاردة، جمعنا لكم أكثر من نوع من الأكلات والسناكس اللي ممكن تاخدوهم معاكوا على البحر السنة دي وتجربوهم سواء عملتوها في البيت أو ممكن تشتروها جاهزة على طول.
Acai أساييي
انتشرت في الفترة الأخيرة على تيك توك بشكل كبير وبقى فيه مطاعم مخصصة للنوع دة من الأكلات. فالأساييي هي عبارة عن سموزي فاكهة ثقيل وسميك وعليه شوفان وقطع فاكهة صغيرة وممكن كمان تزودوا عليه بذور الشيا عشان تستفيدوا بيه أكثر ويشبعكوا لفترة أطول.
هو جاي لينا من البرازيل وجنوب أمريكا المشهورة بالفواكه الاستوائية اللذيذة، وبنسبة كبيرة هيكون سهل أنكم تعملوه في البيت وتحفظوه في الفريزر وتاخدوه معاكوا البحر تاني يوم وتجربوه كسناك جديد.
Pretzels البرتزيلز
من السناكس اللي أول ما بتبدأ فيها مش بتعرف تخلصها، هو سناك مناسب للبحر لأنه مش بياخد وقت في التحضير، وفي الأساس سهل أنكم تلاقوه في أي سوبر ماركت ومتوفر في كل مكان. سناك بحر ممتاز مع صوص حمص أو ممكن يتاكل لوحده لو هو مملح أو بنكهة معينة بتحبوها.
كفتة بالجبنة والمايونيز جوه عيش فينو
من الأكلات اللي أكيد هتسد جوعك لأخر الليل، خصوصاً لو خارجين تتعشوا برة وفي احتمالية عدم وجود أماكن في زحمة الساحل. ومن السهل جداً تجهيز العجينة في المطبخ، أو ممكن تستخدموا عيش فينو جاهز وتحطوا جواه المكونات وتسووها في الفرن.
تقدروا تشوفوا الطريقة كمان من هنا!
البطاطا الحارة على الطريقة اللبنانية
مخبيش عليكم سر حبي للطبق اللذيذ دة، واللي هعتبره أكيد سناك للبحر في الاجازة الجاية. فتجربتي مع البطاطا الحارة كمقبلات في الأساس كانت أكثر من رائعة، جربتها في مطعم من المطاعم اللبنانية هنا في القاهرة، وعجبني جداً طعمها رغم بساطتها. أيوة، وصفتها أسهل مما يكون، تكاد تكون معتادة بالنسبة لينا، فهي عبارة عن بطاطس مكعبات محمرة وعليها خل وبهارات وفلفل أخضر مفرومين بكل بساطة.
جربوها كسناك لذيذ على البحر مع عيش لبناني أو لوحدها مع صوص طحينة.
Cassata آيس كريم كاساتا
تعرفوا أن الكاساتا هي حلوى في الأساس إيطالية!. انتشرت مؤخراً وبشكل كبير على تيك توك وده اللي خلاها تريند الصيف ده على شواطئ الساحل. فبالتأكيد هتلاقوها في إحدى المحلات والمتاجر الخاصة ببيع الآيس كريم.
ولو حابين تعملوها في البيت، فهي سهلة أوي، ببساطة هي كيكة اسفنجية وعليها طبقات مرصوصة من آيس كريم الفواكه.
عشان كدة هتكون سهلة وجاهزة ك سناك على البحر في الصيف دة.
كرواسون بالآيس كريم
Trend Hunter : مصدر الصورة
اتفرجت مؤخراً على فيديوهات سواء على تيك توك أو على يوتيوب لإفتكاسات جديدة للكراسون. وكان منها اللي لفت انتباهي هو كرواسون الآيس كريم، فتخيل معايا عزيزي القارئ، كرواسون مقرمش وناعم وعليه ايس كريم مثلج بالنكهة المفضلة ليك، وفوق كل دة عليه صوص شوكولاتة.
أكيد طبعا أفضل سناك جديد ممكن تجربوه على البحر وتستمتعوا بيه انتم وعيلتكم وسهل جداً كمان تعمله وتجهزه في البيت.
كرواسون ومافن= كرافن
اختراع مش جديد أوي في ساحة المخبوزات والمعجنات الناعمة اللي كلنا بنحبها، لكنها وصفة جديدة ممكن تعتمدوها لو حابين تجربوا بنفسكوا سناك حلو وجديد على البحر وتعلموه انتم كمان بنفسكوا في البيت من غير ما تشتروه جاهز من أي مطعم. اتفرجوا ع الوصفة دي من تيك توك وقولولنا ممكن تجربوها كسناك على البحر أو لأ!
فشار بنكهة الجبنة والثوم كسناك في السريع على البحر
كلنا نفسنا نجرب إفتكاسة جديدة مختلفة للفشار المعتاد، فكلنا بنحبه بالملح والشيتوس وبهارات الجبنة لكن إضافة الثوم، هي اللي ممكن تكون جديدة شوية علينا.
ببساطة، جهزوا طبق عليه معلقة ملح ونص معلقة كمون ونص معلقة بودرة ثوم وعليهم رشة نعناع مجفف لو حابين. ولما يجهز الفشار وهو سخن، حطوا كل المكونات عليهم ومن المفضل أن الفشار يكون معمول بنص معلقة زبدة عشان النكهات كلها تندمج.
سلطة النودلز الخفيفة على الطريقة التايلاندية
Grilled Cheese Social : مصدر الصورة
سلطة كسناك على البحر؟ ليه لأ!. فالسلطات من الأكلات المشبعة جداً والخفيفة اللي ممكن تتاكل على البحر بكل سهولة. طيب، جربتوا سلطة النودلز قبل كده، خصوصاً على الطريقة التايلاندية؟
مكوناتها بسيطة جداً: بصل – بقدونس- جزر- فلفل أحمر رومي – ليمون – صويا صوص- زيت نباتي- صلصة حارة حسب الإختيار.
الطريقة: اطبخوا النودلز وسيبوها تبرد في درجة حرارة الغرفة أو في التلاجة لو مستعجلين. قطعوا المكونات قطع كبيرة أو صغيرة حسب الرغبة، وضيفوها للنودلز مع البهارات الخاصة بيها. وبكدة هتكون جاهزة كأكلة سريعة ومشبعة على البحر ومش هتاخد منكم ٥ دقائق.
تاكوز بيج ماك .. بيج ماك بيتي زي بتاع برا بالظبط!! على طريقة “همم”
من تريندات الأكل اللي شوفناها مؤخرا على تيك توك وانتشرت في كل مكان. وفي دقيقة واحدة هتعرف وصفة “همم” اللي إبتكرناها وخليناها سهلة علشانكم، هي بديل للبرجر المعتاد اللي ممكن ناكله على البحر كوجبة غداء خفيفة مع بطاطس مقلية والصوص اللي بنحبه.
تقدروا تشوفوا الطريقة كمان من هنا!
الخلاصة أن البحر والأجازة يعني أكل وفسح وتجارب أكل وخروجات كثيرة. فمتنسوش تتبسطوا بالأكل والسناك اللي بتحبوه حتى لو كان ساندوتش بسيط أو باكيت بطاطس مقلية وعليها صوص رانش أو حتى كاتشب ومايونيز لذيذ.
