القهوة مشروب كله مفاجآت، والنهارده هنقولكم على ١٠ معلومات هتبهركم عن القهوة.
١- تاني أكبر سلعة بتتباع في العالم!
القهوة تعتبر تاني أكبر سلعة بيتم تداولها في العالم بعد البترول! الناس بتستهلكها بكميات كبيرة جدًّا واللي بيخليها تاني أكتر حاجة مشروبة بعد المياه، وبتبلغ قيمتها أكتر من ١٠٠ مليار دولار في جميع أنحاء العالم!
٢- كانت ممنوعة في وقت الإمبراطورية العثمانية!
شرب القهوة زمان كان بيُعاقب عليه خصوصًا أيام الإمبراطورية العثمانية في القرن السابع عشر، وكانوا بيظنوا إن القهوة نوع من أنواع المخدرات واستخدامها اتحظر في العالم كله!
٣- اتحظرت في مكة:
سنة ١٥١١ القهوة اتحظرت في مكة علشان كانوا بيعتقدوا إنها بتساعد الناس على الكسل، ماكنوش يعرفوا إن الناس مش محتاجة مساعدة في النقطة دي.
٤- اللبن بيخلي القهوة تفضل سخنة:
لما بتضيف لبن مغلي على القهوة ده بيخليها تفضل سخنة عن القهوة السادة بنسبة ٢٠٪
٥- الأمريكان ماقدروش يشربوا الإسبريسو:
في وقت الحرب العالمية التانية الجنود الأمريكان كانوا متمركزين في إيطاليا، وقتها عرفوا الإسبريسو، بس كان تقيل عليهم فكانوا بيخففوه بمياه علشان يعرفوا يشربوه، والإيطاليين سموا المشروب الجديد الخفيف ده “أمريكانو”.
٦- قلة القهوة كانت سبب للطلاق زمان!
في القسطنطينية في القرن السادس عشر كان لما ماتجيبش لمراتك قهوة ده كان سبب كافي إنها تطلب منك الطلاق!
٧- اكتشاف القهوة كان بالصدفة:
بيقال إن أحد رعاة الماعز اكتشف القهوة في إثيوبيا في القرن الخامس عشر الميلادي لما شاف معزة بتاكل نبات القهوة ولاحظ إنها بتبقى نشيطة أكتر ومابتنمش بسهولة، الراعي ده شارك معلوماته دي مع الرهبان المحليين اللي بعد ما جربوا مشروب بحبوب القهوة لقوا إنهم يقدروا يفضلوا صاحيين طول الليل للصلاة، وبعد كده نشروا المشروب.
٨- ممكن تتحول لوقود!
العلماء اشتغلوا على تحويل زيت ناتج عن نفايات القهوة المطحونة لوقود حيوي؛ علشان كده ممكن في المستقبل تسوق عربيتك بوقود معمول من القهوة!
٩- القهوة ماكنتش مشروب طول الوقت:
قبل ما الناس تتعلم إزاي تحضر القهوة كانت قبائل في شرق إفريقيا بتخلطها مع الدهون الحيوانية وتاكلها كغذاء.
١٠- الناس بتشرب قهوة كتير.. أوي:
كمية القهوة اللي بيستهلكها الناس في يوم واحد حول العالم بتوصل لـ ٢٢٥ مليار فنجان قهوة يوميًّا.
