اللبن الذهبي هو مسمى انتشر مؤخرًا بشكل كبير لمشروب لونه ذهبي مكون من اللبن والكركم، وتعتبر الهند هي أصل ومصدر المشروب، وده لإنها مشهورة بإنتاج الكركم.
والسبب وراء شهرة وانتشار مشروب اللبن الذهبي هو إن خبراء التغذية اكتشفوا إنه كنز حقيقي غني جدًّا بالمواد الغذائية اللي بتساهم في الحفاظ على صحة ومناعة جسم الإنسان.
وفي السطور الجاية هنساعدك إنك تعرف أشهر فوائد مشروب اللبن بالكركم، واللي حقيقي هتذهلك وتخليك تعتمده كجزء من نظامك الغذائي اليومي:
١- بيحتوي على نسب عالية من مضادات الأكسدة:
من المعروف عن مضادات الأكسدة إنها بتعمل على طرد الجزيئات الضارة، واللي بتنتج في جسم الإنسان بسبب عملية التمثيل الغذائي. وده بيعمل على المحافظة على صحة خلايا وأنسجة الجسم وبيحميها من الالتهابات. ومضادات الأكسدة بتتواجد بشكل كبير في مادة الكركمين وهي المكون الأساسي للكركم.
٢- بيحمي ويقلل من خطورة الإصابة بالسرطان:
وده لإن الدراسات الحديثة وضحت مؤخرًا إن مادة الكركمين الموجودة في الكركم ليها دور فعال في القضاء على الخلايا السرطانية، وكمان لو دخلنا مكونات تانية للمشروب زي القرفة والزنجبيل فإحنا كده بنرفع معدل الحماية من السرطان.
٣- بيقلل مستوى السكر في الدم:
بيؤدي شرب من 1-6 غرامات يوميًّا من الكركم الموجود في مشروب اللبن الذهبي لخفض سكر الدم بنسبة 29%.
٤- المحافظة على صحة القلب وحمايته من الأمراض:
المواد المكونة لمشروب اللبن الذهبي بتساهم بشكل كبير في تعزيز عمل الأوعية الدموية وبتحميها من التصلب، وكمان بتخفض الكوليسترول في الدم، وكل دي عوامل بتساعد على المحافظة على صحة القلب.
٥- التخسيس وتقليل الوزن:
لو عايز تخس وتقلل وزنك؛ فتأكد إن مشروب اللبن بالكركم هو من الحاجات المهمة واللي هتساعدك جدًّا في تحقيق هدفك. وده لإن مضادات الأكسدة الموجودة فيه بتساعد على رفع مستوى الحرق في الجسم.
٦- مضاد طبيعي للبكتيريا والفطريات والفيروسات:
مكونات مشروب اللبن الذهبي ليها خصائص بتحارب الفيروسات والبكتيريا والفطريات، وبيشتهر في الهند تناول اللبن الذهبي للأشخاص اللي عندهم أدوار برد وإنفلونزا، وده لدوره المؤثر في مكافحة عدوى وفيروسات الجهاز التنفسي.
٧- تحسين وتسهيل عملية الهضم:
بعد وجبة دسمة نقدر نعتبر مشروب اللبن الذهبي اختيار سليم وموفق للمساعدة في عملية الهضم، لإن الكركمين بيزود إنتاج العصارة الصفراء، واللي بتلعب دور مهم جدًّا في هضم الدهون. كمان بيعمل على طرد الغازات، وبيحارب البكتيريا الموجودة في الجهاز الهضمي، وبيقلل من الإصابة بالإمساك أو الإسهال.
٨- تقليل وتخفيف آلام والتهابات المفاصل:
المواد المضادة للالتهابات الموجودة في الكركم ليها تأثير فعال في تخفيف آلام والتهابات المفاصل، وكمان بتحمي الإنسان من مخاطر الإصابة بهشاشة العظام أو الروماتويد.
٩- تحسين المزاج:
الكركمين بيؤدي إلى رفع الحالة المزاجية وبيقلل من الشعور بالإكتئاب، وتم ملاحظة تأثير المادة دي عند المرضى النفسيين وأظهرت نتائج ملفتة.
وده لإن الكركمين بيرفع مستويات عامل التغذية العصبية المشتقة من الدماغ، واللي بتم الإشارة إليه بـ الرمز “BDNF”.
طريقة عمل وتحضير اللبن الذهبي :
المكونات:
- نص كوب لبن حيواني أو نباتي حسب الرغبة.
- معلقة صغيرة من الكركم.
- شرايح زنجبيل طازج أو نص معلقة زنجبيل بودرة.
- نص معلقة صغيرة من القرفة الباودر.
- رشة صغيرة من الفلفل الأسود.
- معلقة من العسل الأبيض للتحلية، (من الفضل استخدام العسل للتحلية بدل السكر الصناعي علشان تحصل على أكبر فايدة من المشروب).
طريقة التحضير:
هنخلط جميع المكونات في إناء صغير، وهنحطه على النار لحد ما يغلي، بعد كده هنهدي النار ونسيبه لمدة عشر دقايق.
هنصفيه في أكواب من أي شوائب، وهنقدمه سخن، ونزين وشه بالقرفة.
