الكلام على موضوع الأكل قبل وبعد التمرين، والمفروض ناكل إيه أصلًا قبل التمرين وبعده كتير جدًّا ومتنوع، واختلفت فيه الأقاويل؛ فأحيانًا بنسمع إنه غلط تاكل قبل التمرين، وأحيانًا العكس. وبما إن التمارين والجيم بقوا جزء لا يتجزأ من اللايف ستايل لفئة كبيرة من الناس، بقى من الضروري والمهم إننا نعرف إيه اللي المفروض ناكله قبل وبعد التمرين؟ وإيه الوقت المناسب والوقت الغلط للوجبات؟
هنا هنتعرف على كل اللي يخص الوجبات الغذائية اللي المفروض نهتم بأكلها قبل وبعد التمارين علشان نقدر نحقق أفضل استفادة من الوقت اللي بنتمرن فيه:
ناكل إيه وإمتى قبل التمرين؟
بما إن الجسم بيبذل مجهود عالي في أثناء التمرين، وبيفقد نسبة من الماء والأملاح المعدنية فإن أنسب وقت لتناول الوجبة الغذائية هي قبل التمرين بساعتين على الأقل، أما لو التمرين بتاعك في فترة الصبح فضروري إنك تحاول تصحى قبل التمرين بفترة كافية علشان تتناول وجبة الفطور، وده لإن الجسم بعد الاستيقاظ من النوم صباحًا بيكون محتاج لتخزين الطاقة مرة ثانية بعد فترة الصيام الطويلة اللي مر بيها خلال النوم. والغذاء المثالي قبل التمرين هي وجبة متكاملة بيكون فيها بعض البروتين ونسبة كبيرة من الكربوهيدرات الصحية لإنها المصدر الرئيسي اللي هيمنحك الطاقة في أثناء التمرين.
وأهم حاجة تبتعد عن المأكولات صعبة الهضم واللي بتسبب إجهاد للمعدة زي الأطعمة الغنية بالألياف، وكذلك الأطعمة الدهنية. ومن أهم المأكولات اللي بتسبب مشاكل في أثناء التمرين ويجب الامتناع عن تناولها هي السكر الصناعي والدقيق الأبيض؛ زي المخبوزات والعصائر الصناعية والحلويات اللي بتحتوي على نسبة كبيرة من السكر . وده لإنها بترفع مستوى السكر في الدم في أثناء التمرين، وبعدها بينخفض السكر بشكل مفاجئ، وده بيسبب اختلال وعدم توازن للرياضي اللي بيتمرن.
ومن أمثلة الأطعمة المهمة والمفيدة قبل التمرين وبتدي طاقة كويسة :
التوست البني, والأفوكادو, والحبوب الكاملة، والشوفان، وزبدة الفول السوداني، والعصائر الطبيعية الخالية من السكر, والزبادي أو اللبن خالي أو منخفض الدسم، والمكسرات، والشيكولاتة الداكنة.
كمان من المهم جدًّا شرب كميات كافية من المياه قبل التمرين لتعويض الماء والأملاح المعدنية اللي بتفقد عن طريق العرق في أثناء التمرين.
طيب ناكل إيه وإمتى بعد التمرين؟
طبعًا مش مفضل أبدًا تناول الطعام بعد التمرين مباشرة؛ وده لإن الجسم بيكون في حالة إجهاد عالية، ولازم نستنى على الأقل من نصف ساعة إلى ساعة قبل الأكل، علشان تكون نبضات القلب رجعت لمستواها الطبيعي, وكمان يرجع الجسم لحالة الهدوء اللي يمكنه فيها امتصاص والاستفادة من المواد الغذائية اللي بياكلها.
أهم حاجة في وجبة ما بعد التمرين هي البروتين اللي بيحتاجه الجسم في عملية الاستشفاء اللي بيدخل فيها الجسم بعد بذل مجهود كبير.
وهَنِدِّي هنا مثال لوجبة مثالية لبعد التمرين:
- البروتين وهو أهم عنصر فممكن نتناول لحوم، أو أسماك، أو دجاج، أو بيض، أو تونة.
- الألياف زي الشوفان، والتوست البني، والأرز البني، والحبوب الكاملة.
- خضار وفواكة زي الأفوكادو، والسبانخ، والبروكلي، والبطاطا الحلوة.
- القليل من الدهون الصحية زي زيت الزيتون، أو تناول بعض المكسرات على سبيل المثال.
والأهم من الوجبة دي تناول وشرب سوايل كتير علشان تعوض اللي فقده الجسم في أثناء التمرين، لإن قلة السوايل ممكن تسبب بعض الأعراض المزعجة زي : الصداع الحاد، والغثيان، والجفاف: (التشنجات العضلية).. وغيره.
