من المعروف عن الجهاز المناعي إنه الجهاز المسؤول عن حماية الجسم من الأمراض، واللي من غيره هيكون سهل جدًّا على البكتيريا والفيروسات إنها تهاجم جسم الإنسان وتسبب له أمراض مختلفة. علشان كده يعتبر الجهاز ده من أهم الأجهزة الموجودة في جسم الإنسان.
وبما إن الجهاز المناعي يعتبر هو الدرع اللي بيحمي الإنسان وبيحافظ عليه؛ هنلاقي كتير من الناس بيسألوا هل من الممكن إننا نحافظ على جهازنا المناعي ونقويه؟ خصوصًا في فترة من أصعب الفترات الي بنعيشها وهي فترة وباء الكورونا.
والإجابة: طبعًا، وهنا هنوضح لك أهم الأغذية اللي بتساعد على تقوية الجهاز المناعي بشكل طبيعي:
١- العسل:
طبعًا معروف عن العسل من زمان جدًّا فوايده العظيمة والكتيرة، خاصةً في موضوع تقوية جهاز المناعة، وده لإن العسل موجود فيه مضادات للأكسدة واللي بدورها بتعمل على محاربة الأمراض، وكمان للعسل خصائص مضاده للجراثيم والبكتريا والفطريات. وعلشان تستفيد من العسل يفضل أنك تدوب معلقة عسل في كوب مياه دافية وتشربها على الريق وده هيمنحك بداية يوم قوية ونشيطة.
٢- الفواكه الحمضية:
زي الليمون والجريب فروت والبرتقال، وده طبعًا لإنها بتحتوي على كمية كبيرة من فيتامين سي، واللي ليه دور كبير جدًّا في تقوية ورفع المناعة، ومن المعروف والمشهور جدًّا، إنه بيتم استخدامه، وتناوله للناس اللي عندهم زكام وأدوار برد وإنفلونزا، وطبعًل بيساهم في تسريع عملية الشفاء، وبيخفف كتير من حدة الأعراض.
٣- الزبادي:
من المعروف إن الزبادي غني بالبروتين والبكتيريا الحية المفيدة، والاتنين دول مسؤولين وليهم دور فعال في المحافظة على صحة وسلامة الجهاز المناعي .
٤- الخضار بأنواعها المختلفة:
خاصةً اللي بتحتوي على فيتامين سي بشكل أكبر؛ زي الفلفل الأحمر، والخضراوات الورقية زي: السبانخ والبقدونس والكزبرة، وكمان البطاطا والبروكلي والطماطم والثوم.
٥- الشاي الأخضر:
من المعروف عن الشاي الأخضر إنه المشروب اللي بيتربع على عرش المشروبات الغنية بمضادات الأكسدة، واللي ليها دور كبير وحيوي في محاربة الأمراض والمواد الضارة جوه الجسم، ولذلك شرب كوبين من الشاي الأخضر كل يوم هيساعدك إنك تتمتع بجهاز مناعي قوي وصحي.
٦- اللوز:
هو واحد من أشهر المكسرات الغنية بالدهون الصحية، وكمان بيحتوي على نسبة عالية من فيتامين هـ؛ اللي ليه دور كبير جدًّا في المحافظة وتقوية جهاز المناعة، علشان كده حاول تدخل اللوز ضمن نظامك الغذائي اليومي.
٧- الأسماك والمأكولات البحرية:
الأسماك والمأكولات البحرية خصوصًا سمك السلمون غنية عن التعريف بأنها بتحتوي بشكل كبير على دهون صحية وأوميجا ثري، والعناصر دي بتساهم بشكل كبير في تحسين عمل الجهاز المناعي بشكل أفضل.
٨- شوربة الفراخ:
وده لإن شوربة الفراخ بيكون فيها نسبة كبيرة من الجيلاتين اللي بيتكون في الشوربة من عظم الفراخ أثناء عملية سلق الفراخ، والجيلاتين ده مسؤول وليه دور مهم في تقوية وعمل الجهاز المناعي. فلو أنت مصاب بدور برد أو زكام؛ فالاختيار الأمثل والأفضل ليك هو طبق شوربة دجاج دافيء.
٩- الزنجبيل:
معروف عنه إنه غني بمضادات الأكسدة، وإنه مضاد طبيعي للالتهابات والبكتيريا، وبيساعد بشكل قوي وملحوظ في تقوية جهاز المناعة، وكمان بيعمل على محاربة السرطان.
والأفضل إنك تستخدم شرايح الزنجبيل الفريش أكتر من مسحوق الزنجبيل البودرة، وده لإن الزنجبيل البودرة بيفقد كثير من فوايده أثناء تحضيره.
وأخيرًا علشان تقدر تحافظ على جهاز مناعي سليم وقوي؛ لازم تعرف إنه مطلوب منك المحافظة على أسلوب حياة صحي، وده بيتم بإنك تعتمد وجبات صحية ومغذية يوميًّا، وتكتر من أكل الفواكه والخضروات، وتشرب مياه ومشروبات صحية كتير، وتتجنب المأكولات المصنعة والوجبات السريعة لإنها مضرة جدًّا وبتساهم في تقليل كفاءة جهازك المناعي.
