أكيد سمعت عن نظام الكيتو قبل كده، سواء من صحابك ومعارفك أو عدى عليك في إعلان أو توك شو مثلًا. وغالبًا كل اللي تعرفه إنه نوع من أنواع الدايت اللي تقدر من خلاله تخس وتخسر وزن بالرغم إنك بتاكل لحوم ودهون براحتك. ونحب نبشرك إن ده حقيقي فعلًا!
ده أهم اللي بيميّز نظام الكيتو، ليه بقى؟ لإن الدهون من أهم المواد الغذائية اللي بتدي إحساس بالشبع أو زي ما بنقول كده هي اللي “بتِلكِم”. وده اللي بيخلي معظم الأنظمة التانية صعب الاستمرار عليها لأي حد بيحب الأكل لإن الأكل مش بيديك إحساس الشبع اللي أنت متعود عليه؛ لإنها بتعتمد على تقليل الدهون والكربوهيدرات حتى لو هتاكل لحوم فدايمًا بينصح تكون مشوية عشان تفقد دهونها ولو لحمة تكون اللحمة حمراء قليلة الدسم. المهم بقى بعد الكلام الحلو ده؛ ندخل في التفاصيل ونعرف إيجابيات وسلبيات نظام الكيتو وإزاي نمشي عليه.
إيجابيات نظام الكيتو:
١. خسارة الوزن:
زي ما قولنا فوق إن نظام الكيتو بيعتمد في الأساس على إدخال الدهون للجسم باستمرار، وده بيأدي لانخفاض مستوى الإنسولين (الهرمون المسؤول عن تخزين الدهون في الجسم) وده لإن الجسم دايمًا فيه دهون كفاية فمش محتاج يخزن دهون، بالعكس محتاج يحرق الدهون المتخزنة أصلًا وبكده بتخس بكل بساطة. وعلميًّا كمان تم إثبات إن نظام الكيتو واحد من أفضل الأنظمة الغذائية على المدى الطويل مقارنة بالأنظمة اللي بتعتمد على تقليل الدهون وزيادة الكربوهيدرات.
٢. تنظيم مستوى الكولسترول وضغط الدم:
نظام الكيتو بيحسّن مستويات الدهون الثلاثية ومستويات الكوليسترول اللي بتأثر على سيولة الدم وبيحسّن الدورة الدموية، وعمومًا الأبحاث أظهرت إن الأنظمة قليلة الكربوهيدرات وعالية في الدهون بتأدي لزيادة كبيرة في الـ HDL (الكوليسترول المفيد) وكمان بتقلل من تركيز الـLDL (الكوليسترول الضار) على عكس الأنظمة التانية.
طبعًا الكوليسترول مرتبط ارتباط مباشر بضغط الدم، وكمان مشاكل الضغط بتظهر أكتر مع زيادة الوزن وتصلّب الشرايين اللي لسة متكلمين عنه وإن الكيتو بيحسّن الدورة الدموية عمومًا فبالتالي بيظبط مستوى ضغط الدم.
٣. زيادة النشاط وإبطاء شعور الجوع:
علميًّا الدهون هي المصدر الأساسي والأهم للطاقة مقارنة بكل الأغذية على عكس المشاع إن الكربوهيدرات مثلًا المصدر الأغنى بالطاقة، آه الكربوهيدرات مصدر كويس للطاقة؛ بس مافيش مقارنة بينها وبين الدهون. حتى إن الدهون معروفة بمصطلح “وقود الطاقة” ده غير طبعًا إن الدهون أبطأ المواد غذائية في الهضم واللي ممكن توصل لحد ٤٠ ساعة، يعني يومين تقريبًّا علشان كده صعب تحس بالجوع بسرعة بعد أكل دسم.
٤. تنظيم السكر في الدم والحماية من مقاومة الإنسولين:
مقاومة الإنسولين يعتبر عَرَض مش مرض وهي حالة فسيولوجية بتخلي الإنسولين أقل فعالية في تخفيض مستوى السكر في الدم، ومع استمرار الحالة دي ممكن جدًّا التعرض للإصابة بمرض السكري. لكن نظام الكيتو أصلًا بيساعد على تقليل مستويات الإنسولين للمستويات الصحية، لإنك شبه بتمنع الكربوهيدرات والسكريات اللي بتأدي لمقاومة الإنسولين من الأساس.
٥. تحسين التركيز والأداء العقلي عمومًا:
بالرغم إن معظم الناس بتستخدم الكيتو علشان تخس؛ لكن فيه مجموعة كبيرة من الناس اللي مش محتاجة تخس بتعتمد على نظام الكيتو لإنه بيحسن الأداء العقلي وبيعلّي مستوى التركيز، ليه بقى؟ لأن زي ما قولنا قبل كده الدهون وقود الطاقة، وتعتبر الغذاء الأهم للمخ، وكمان مع تقليل الكربوهيدرات فأنت بتتجنب الارتفاع المفاجئ في نسبة السكر في الدم، اللي بيأدي لقلة التركيز.
دلوقتي بعد ما عرفنا فوايد الكيتو، قولولنا بقى قررتوا تجربوه؟ ولا فتحنا نفسكم على اللحمة وبس؟
