تحضير لانش بوكس أو وجبة لطفلك في المدرسة كل يوم طول السنة، وتكون متنوعة ومفيدة صحيًّا ومتوازنة هو موضوع صعب ومحيّر لأمهات كتير، خصوصًا لو الأم عندها أكتر من طفل، أو إن طفلها مش بيحب أنواع معينة من الأكل، وده اللي بيزوّد صعوبة الموضوع.
وهنا هنقدم لِك ١٥ فكرة هتساعدك، وتقلّل من حيرتك، وتسهّل عليكي مهمة تحضير لانش بوكس مفيد وصِحي لطفلِك. والأهم من كده إنك لازم تعرفي إن اللانش بوكس بيكون فيه كل العناصر الغذائية اللي بيحتاجها طفلك طول يومه الدراسي، زي البروتين الموجود في البيض واللحوم والفراخ. والكربوهيدرات اللي بتديله الطاقة وبتكون موجودة في العيش والبطاطس والحبوب والمخبوزات. والكالسيوم الموجود في الأجبان ومنتجات الألبان زي اللبن والزبادي. والفيتامينات الموجودة بشكل كبير جدًّا في الخضار والفواكة المتنوعة.
الفكرة الأولى:
بيضة مسلوقة ومتقطعة شرايح.
ربع رغيف جبنة نيستو.
علبة زبادي.
شرايح من الخيار والجزر.
كوكيز الشوفان للتحلية.
الفكرة الثانية:
قطعة بانيه مشوية وممكن نضيف ليها شوية كاتشب عشان الطفل ينجذب لأكلها.
سوتيه خضار معمول من الجزر والكوسا.
شرايح تفاح.
علبة لبن بالفواكه.
الفكرة الثالثة:
بيض معمول على شكل قرص وبنقفله وبنحشيه بأي نوع جبنة بيحبها طفلك.
شرايح طماطم وخيار.
علبة لبن.
علبة صغيرة نحط فيها شوية مكسرات زي الفول السوداني واللوز والجوز والزبيب، وده لإنها غنية بالطاقة والأوميجا ثري.
الفكرة الرابعة:
شريحة برجر هنعملها ساندوتش وهنضيف لها خس ومايونيز.
شرايح خيار.
شوية عنب.
علبة زبادي.
قطعة كيك للتحلية.
الفكرة الخامسة:
شرايح توست محشية جبنة رومي.
بيضة مسلوقة.
عصير فراولة طازة.
قطعة كيك للتحلية.
الفكرة السادسة:
ساندوتش فينو فيه بيض مقلي وطماطم.
3 قطع جبنة نيستو.
واحدة بطاطا مشوية.
علبة زبادي.
برتقالة.
الفكرة السابعة:
مكعبات فراخ مطبوخة بالبصل والفلفل الألوان.
سلطة فواكه فيها فراولة وتفاح وموز.
شرايح خيار وجزر.
علبة لبن بالفراولة أو بالموز.
الفكرة الثامنة:
قطعة بيتزا بالفراخ والجبنة، أو ممكن نحضرها على شكل ميني بيتزا مخصصة للانش بوكس.
2 جوافة.
علبة زبادي.
قطعة أو بار حلاوة طحينية.
الفكرة التاسعة :
ساندوتش رومي مدخّن مع جبنة شيدر.
سلطة الفواكه بالزبادي، ودي عبارة عن قطع فواكه زي الموز والفراولة وبنخلطها بالزبادي ونحلّيها بالعسل.
شرايح فلفل ألوان.
بسكويت بجوز الهند للتحلية.
الفكرة العاشرة:
قطع من شاورما الدجاج.
بطاطس بيوريه.. بطاطس مسلوقة ومهروسة مع اللبن ورشة ملح وفلفل أسود وكمون.
علبة رز بلبن متحلي بالعسل ونضيف ليه شوية زبيب ومكسرات.
شرايح خيار وطماطم.
الفكرة الحادية عشر:
ساندوتش جبنة بيضاء مع شرايح زيتون أسود وفلفل أخضر رومي.
بيضة مسلوقة.
موزة.
عصير برتقال فريش.
قطعة من الشيكولاتة للتحلية.
الفكرة الثانية عشر:
شرايح توست بزبدة الفول السوداني وشوية عسل.
3 حبات من جبنة النيستو.
عنب وشرايح أناناس.
خمس حبات عين جمل.
علبة لبن بالشوكولاتة.
الفكرة الثالثة عشر:
دبوستين فراخ مشوية.
طماطم شيري وشرايح جزر.
توست بالمربى.
علبة زبادي.
4 حبايات فراولة.
الفكرة الرابعة عشر:
حبوب فطار جاهزة زي الكورن فليكس مع قطع فواكه مجففة.
سلطة أفوكادو وجزر مبشور.
علبة لبن.
كوكيز شيكولاتة للتحلية.
الفكرة الخامسة عشر:
ساندوتش فينو بالجبنة الكريمي.
علبة زبادي بالفراولة.
برتقالة.
كب كيك محشيّة مربى للتحلية.
