السحلب واحد من أهم المشروبات الشتوية، والحقيقة مش كل البراندات بتعمله حلو مهما كانت مشهورة، والنهارده همم هتشاركم أجمد 5 براندات سحلب، والفرق بينهم.
١- سحلب حلو الشام:
حلو الشام منزل أكتر من نوع سحلب، في سحلب حلو الشام الكلاسيك، وسحلب بالفسدق، وواحد تاني بالبندق، وسحلب مكسرات، بس النهارده هنتكلم عن السحلب الكلاسيك.
أول حاجة لون السحلب بيبقى أبيض أكتر من أنواع تانية، كميته كبيرة وسعره حلو أوي، وبيكون معاه كيس صغير مكسرات، لكن الكيس بيبقى أغلبه جوز هند.
مكتوب عليه إن فيه سكر بس ممكن تحتاج تزود حبة فمن الأفضل تدوقه قبل ما تزود السكر.
كمان هو بيتقل بسرعة ومكتوب معلقتين لكل كوب لبن، فمن الأفضل بردو إنك تحط معلقة واحدة وتزود كمية السحلب بالتدريج.
٢- سحلب أبو عوف:
سحلب أبو عوف معروف طبعًا، وبيتميز بإن ريحته حلوة، وبيكون معاه كيس مكسرات، لكن المشكلة إنه بيبقى موجود جوه السحلب نفسه فممكن تبهدل الدنيا وأنت بتطلعه.
ميزته إنه مابيتقلش أوي حتى لو زودت الكمية، ومافيهوش طعم نشا.
لونه أغمق شوية وفيه سمسم بيديله طعم حلو أوي.
٣- سحلباشا من دريم:
أكتر ميزة فيه إن سعره على قد الإيد، مافيهوش كيس مكسرات لكن المنتج نفسه فيه سمسم بيديله طعم حلو أوي، فلو بتحب السحلب من غير مكسرات فبنرشحلك سحلباشا.
نسبة السكر فيه قليلة، فممكن تحتاج تحليه، لكنه قوامه وطمعه كريمي جدًّا، ودي حاجة بتميز منتجات دريم عمومًا، وكمان بيتقل بسهولة فلو بتحب السحلب خفيف شوية حط معلقة واحدة على كوباية اللبن.
٤- سحلب زادنا:
سحلب زادنا سعره أغلى شوية، وده ممكن علشان بيجي معاه علبة مكسرات كبيرة ومتنوعة، كميته كمان كبيرة لكن طعمه مظبوط، مافيهوش طعم نشا، وبيكون حلو وكريمي.
٥- سحلب الحج عرفة:
علبة سحلب الحج عرفة شكلها حلو وسهلة الفتح، وكمان سعرها كويس، لكنها بدون مكسرات، بس هتلاقي في خليط السحلب نفسه سمسم بيديله طعم حلو أوي.
طعمه قريب من طعم سحلب زادنا، لكن المميز إن فيه طعم جوز هند وفانيليا خفيف بيدي نكهة حلوة جدًّا، ولو بتحب السحلب تقيل هتحتاج تزود الكمية على كوب اللبن علشان يتقل معاك زي ما تحب.
