الأكل من الحاجات الممتعة والمسببة للسعادة لمعظم البشر، وأكيد لما تكون في مود أو مزاج سيء وأكلت حاجة بتحبها، أو قعدت في مطعم جميل مودك بيتغير؛ لكن أكيد مش هتكون سعيد أبدًا لو دخلت مكان عشان تاكل، وبعد ما خلصت اكتشفت إن المكان غالي لدرجة إنه فضى محفظتك وجيوبك.
في ناس كتير من محبين الأكل ومتذوقينه معندهمش مشكلة في إنهم ياكلوا أطباق نادرة وغالية ممكن تكلفهم ألوف الدولارات بدون مبالغة، وهنا ممكن نتساءل بشكل بديهي: هو أنا إيه اللي يخليني أدفع في طبق أو أكلة آلاف الدولارات؟
لأسباب كتير طبعًا من أهمها : إنه ممكن يكون المكون الرئيسي المصنوع منه الطبق نادر أصلًا، أو إنك بتاكل في مكان بيشتغل فيه شيف عالمي ومشهور.. وفي السطور الجاية هنذكر أهم وأغلى الأكلات في العالم:
الكافيار:
على رأس القائمة طبعًا، ومعروف إنه طعام الأغنياء، ويعتبر مكون غالي بسبب ندرته، والكافيار أصلًا هو بطارخ أو بيوض نوع معين من الأسماك النادرة، والتي بتحتاج لسنتين علشان توصل لمرحلة البلوغ، وتبدأ في إنتاج البيض المعروف باسم الكافيار، واللي بيزيد من ندرة النوع ده إنك لازم تقتل السمكة علشان تحصل على الكافيارو وبيوصل سعر الكافيار الأبيض المستخرج من سمكة الحفش لـ 34500 دولار!
الفواغرا أو كبدة البط أو الأوز:
طبعًا مش أي كبدة بط أو أوز، ولكن ده نوع من كبدة البط أو الوز اللي بيتم تسمينه بطريقة معينة بتخلي للكبدة طعم مميز وغني وملمس ناعم، والمصريين القدماء هم أول ناس ابتكروا الفكرة دي، وبيوصل سعر الرطل الواحد إلى لـ 80 دولار.
الكمأ الأبيض:
نوع من الفطر الي بيتكون لوحده في التربة؛ بمعنى إنه مش ممكن زراعته، وده السبب اللي بيخليه يعتبر فطر نادر، وليه طعم ومذاق مميز جدًّا، وقيمة غذائية عالية بتخليه مكون رئيسي في الأطباق الفاخرة، وممكن يوصل سعر الكيلو ونص من فطر الكمأ الأبيض إلى 330 ألف دولار!
الزعفران والمعروف باسم الذهب الأحمر:
نوع من التوابل بيدي الأطباق لون أصفر مميز ونكهة جميلة، والسر في ارتفاع سعره بيرجع إلى إن زهرة الزعفران مش بتنمو غير أسبوعين بس في السنة، ولازم يتم جمع المحصول أو زهور الزعفران بشكل يدوي وبطريقة خاصة بتكون شاقة، وعلشان يتم جمع كيلو واحد من الزعفران هتحتاج تحصد حوالي 300 ألف زهرة زعفران!
سمك الفوجو السام:
هي سمكة مشهورة جدًّا في اليابان على الرغم من كونها سمكة سامة، وده السبب في أن سعرها مرتفع؛ علشان لازم يحضرها شيف يكون متدرب على طبخها، والتعامل معاها على الأقل لمدة 3 سنوات، وبيوصل سعر السمكة لـ 470 دولار.
البطيخ الأسود:
زي ما قرأت فعلًا، بطيخ لونه أسود! بيتم زراعته في اليابان، وطعمه حلو وملمسه مقرمش، وبيوصل سعر البطيخة الواحدة ل 6000 دولار، لإن النوع ده من البطيخ بيحتاج لمساحات كبيرة لزراعته، وشهور كتير من الرعاية وده اللي بيخلي إنتاجه نادر في الأصل.
عش الطائر الأحمر:
شوربة مشهورة جدًّا وغالية جدًّا ومشهورة جدًّا بالأخص في المطبخ الصيني، وده لإن بيتم تكوينها من أعشاش طيور السمان المتواجدة بكثرة في جنوب شرق آسيا، وبتقوم طيور السمان ببناء الأعشاش الخاصة بيها باللعاب بتاعها، اللي بيتحول بعدين لمادة جيلاتينة غنية بالعناصر الغذائية زي الكالسيوم والحديد والبوتاسيوم . وبتتراوح المدة اللي بيحتاجها طائر السمان علشان يبني عشه لـ 35 يوم، وهيكلفك طبق شوربة عش الطائر الأحمر 10000 دولار .
