المطبخ الأوروبي مشهور بتقديم ألذ وأشهر الوصفات من كافة أنحاء العالم زي روسيا وشمال أمريكا ونيوزلندا، ولكل دولة أوروبية المطبخ الخاص بيها وأكلاتها الفريدة من نوعها، ده غير نكهاتها المميزة واللي بتعكس ثقافة الدولة. واتطورت الأطباق المحلية في البلاد الأوروبية وبقت تتمتع بشهرة كبيرة على المستوى العالمي.
في مقال النهارده هنتكلم عن أشهر الأكلات في قارة أوروبا وحكاية كل أكلة منهم وبلدها.
كرواتيا – بلاك ريزوتو:
الطبق ده في كرواتيا، من الأطباق المشهورة اللي مش هتلاقيها غير فيها، لذيذ و طعمه لا يُقاوم.
بس يعتبر من الأطباق الغريبة والشائعة، علشان لونه أسود و دي حاجة نادرة جدًّا، ولكن دي ميزة عن بقية الأطباق وبيخليك عندك الرغبة إنك تجربه.
الطبق عبارة عن الحبار الأسود أو الكالاماري مطبوخ على الطريقة الكرواتية المميزة، الطبق ده غني بالفيتامينات والعناصر الغذائية الأساسية لصحتك، ويعتبر وجبة صحيّة متكاملة.
الدنمارك – الساندويتشات الدنماركية:
يعتبر الطبق ده من الأطباق التقليدية في الدنمارك، بيتميز ببساطته وسهولته كمان. ممكن يبقى طبق رئيسي على السفرة أو ممكن يكون كمقبلات تستمتع بيها جنب الأكل.
عبارة عن ساندويتش مفتوح من فوق، يتكون من عيش الجاودار بالزبدة والحشوة عبارة عن لحمة باردة أو مأكولات بحرية بميكس من أنواع الجبن المختلفة والكافيار، وبيضاف للحشوة الخضار والأعشاب وبعض التوابل.
اللي اخترعه هم المزارعين الاسكندنافيون اللي اتعودوا على تجميع بقايا الأكل بتاعهم من الليالي اللي فاتت من أكلهم وياكلوها وهم بيشتغلوا لساعات طويلة علشان تديهم الطاقة لما ييجوا يشتغلوا.
اليونان – جيروس:
يعتبر الجيروس من أشهر الأطباق الشعبية في الشارع اليوناني، يحتوي على اللحم البقري أو الفراخ أو اللحمة الضاني.
بيتم تقطيعها شرايح وبعد كده تتشوي وتتحط على عيش البيتا ويتحط عليها صلصة زي التزاتزيكي وشوية خضار زي الطماطم والبصل والخس والخيار.
وجبة متكاملة ودسمة تنفع لوقت الغداء أو الوجبات المتأخرة، وانتشر بصورة كبيرة حول العالم من خلال المطاعم اليونانية الشعبية.
المجر – جولاش:
يعتبر الطبق الوطني في المجر، والشعب المجري بيسميه أسماء كتيرة، لكن ده بيرجع لصعوبة اللغة ونطقها ولكن “جولاش” هو الاسم الأكثر شيوعا للطبق ده.
الطبق عبارة عن دِمعة (صلصة) في طبق فخار ، مع لحم البقر المطبوخ على نار هادية، وبيضيفوا ليه جزر وبصل وكميات كبيرة من الفلفل المجري الحلو (البابريكا) عشان يديله الريحة والطعم.
