أكتر حاجة مميزة في الشتاء هو البرد اللي بيفتح شهية الناس للأكل وده بسبب إن الجسم بيحتاج طاقة علشان يدفي نفسه، ويحافظ على درجة حرارة ثابتة، ومعروف إن الأطعمة والمأكولات اللي بتحتاج وقت أكبر في الهضم هي اللي بتمنح الجسم التدفئة.
وفي مقال النهارده هنشاركم ٩ أكلات ومشروبات اللي هتساعدك في الشتاء على محاربة البرد وتزود التدفئة.
١- شوربة العدس:
شوربة العدس هي واحدة من أشهر الأكلات الشتوية في البيوت المصرية، ونقدر نعتبر الأكلة دي هي ملك الشتاء بلا منازع. ومن أهم مزايا العدس غير أنه بيمنح الدفء، إن ثمنه منخفض وفي متناول الجميع، وبيمنح الجسم قيمة غذائية عالية، وده لإنه بيحتوي على البروتين النباتي، والأحماض الأمينية اللي بتلعب دور كبير في رفع مناعة الجسم والمحافظة عليه من الأمراض. ده غير إن طريقة تحضيرها غاية في البساطة: سلق الطماطم والبصل والجزر مع العدس, وبيتم ضرب جميع المكونات في الخلاط للحصول على القوام المناسب، وبتتقدم سخنة وبنزين وشها بالبصل المتكرمل.
٢- حمص الشام:
حمص الشام يعتبر وجبة شتوية بامتياز، وده لإن جميع المكونات اللي بتدخل في طريقة عمله بتساعد على منح الطاقة والتدفئة، فالحمص بيحتوي على البروتين اللي بيحتاج وقت أطول للهضم، وبالتالي بيساعد على المحافظة على حرارة الجسم، ده غير تتبيلة الشطة والخل والليمون، واللي بتعمل على رفع درجة حرارة الجسم فورًا.
٣- البطاطا الحلوة:
بتساعد على التدفئة بشكل كبير وده لإنها بتحتوي على نسبة عالية من الكربوهيدرات اللي بتمنح الطاقة للجسم. بتنتشر في الشوارع المصرية في فصل الشتاء عربيات البطاطا واللي بتقدمها بطرق مختلفة، سواء مشوية أو مسلوقة، وبتتقدم في أطباق بيتم تزيينها بالمكسرات وجوز الهند.
٤- الكشك:
أكلة مشهورة جدًا في بعض البلدان العربية زي مصر وسورية والعراق، ولكن بتختلف طريقة تحضيرها من دولة لأخرى. ولكن الأكيد إن القمح واللبن اللي بتتكون منهم الكشك بيساعد الجسم على الإحساس بالشبع والدفء لفترة طويلة.
٥- القلقاس:
القلقاس أصلًا نبات شتوي، وبيعتبر أكلة مشهورة جدًّا في البيوت المصرية في فصل الشتاء، وده لإنه بيمنح طاقة عالية جدًّا. ودفا بعد تناوله في مقابل سعره المنخفض. وبيتم تحضيره بتقطيعه لمكعبات متساوية بيتم طبخها بمرقة البط أو اللحمة أو الفراخ، وبيتم إضافة بعض الخضروات الورقية الخاصة بالقلقاس (السلق)، وبيتقدم مع الرز الأبيض.
٦- المكسرات بأنواعها:
تعتبر المكسرات من المأكولات اللي بتحتوي على زيوت نباتية وكربوهيدرات بتساعد على منح الشعور بالدفا، طبعًا غير فوايدها الأخرى المتعددة لصحة الجسم.
٧- السحلب:
مشروب خاص جدًّا بفصل الشتاء، ومعروف من أيام الدولة العثمانية في مصر، وبالإضافة لطعمه الجميل والمميز وقوامه التقيل؛ بيمنح الجسم طاقة عالية، وده لإنه غني جدًّا بالسعرات الحرارية.
٨- الكاكاو والشوكولاتة الساخنة:
الكاكاو أو مشروب الشيكولاتة الساخنة المعروفة بالهوت شوكلت خصوصًا لو معمولة باللبن بتمنح الجسم طاقة وبتساعده على الشعور بالدفا، ده غير فوايدها الصحية الكتير، خصوصًا في الجانب النفسي، وده لإنها بتعمل بشكل كبير على تحسين المزاج ومحاربة الاكتئاب. فكوب من الكاكاو أو الهوت شوكلت في ليلة شتوية باردة هو اختيار مثالي جدًّا.
٩- مشروب القرفة والزنجبيل باللبن:
مشروب مغذي جدًّا ومفيد في الحصول على الإحساس بالدفا، ده غير فوايده الصحية واللي من أهمها إن الزنجبيل والقرفة ليهم دور كبير جدًّا في رفع مناعة الجسم وحمايته من الأمراض، خصوصًا في فصل الشتاء المشهور بانتشار أدوار البرد والإنفلونزا.
